Austen møter Vesten i norrøn mytologi

Slik den norrøne gudelæra blir forklart i skolen, måtte vi tru det var tale om ein nordisk urreligion. Og endå om vi fekk vite at noko er ein arv frå Austen, var vi indoktrinerte til å tru at impulsane alltid kom til oss gjennom Vest-Europa. I denne boka har Arnt Løftingsmo ein annan innfallsvinkel, han fører oss til handelsruta frå Midtausten beinveges nord til Kvitsjøen. Her blei orientalske kjøpmenn i vikingtida rike på mår- og ekornskinn, dyre varer som samar og andre fangstfolk skaffa frå skogar og marker i nord. Den same vegen frå Austen kom dei eksotiske volvene som i norrøne sagaer er kalla spåkoner. Forfattaren hevdar at dei var zarathustriske iranske misjonærar som skulle verke for ein betre moral i vikingland.