Damp, diesel og pågangsmot

Det er no gått 30 år sidan Veteranskipslaget Fjordabåten vart skipa og gamle "Stord" henta heim frå Oslo, og det er 22 år sidan laget kjøpte lokalrutebåten "Granvin" like etter at den gjekk ut av rutetrafikk i Hardanger. Begge båtane er teke vare på og representerer kvar sin generasjon og fartøytype. Gjennom aktiv bruk er båtane blitt naturlege innslag i fjordane våre. Nye generasjonar har fått høve til å bli kjende med båtane og korleis det var å reisa i tidlegare tider då sjøen var vegen. Harald Sætre har heilt frå barndommen hatt interesse for skipsfart, særleg for lokalrutebåtane på Vestlandet. Han har i 30 år vore aktiv med i Veteranskipslaget Fjordabåten, både som tillitsvald, med administrativt arbeid og som mønstra mannskap på båtane.