Anders Hovden

Diktarpresten Anders Hovden (1860-1943) skreiv fleire romanar og barnebøker, men det var som lyrikar og salmediktar han nådde lengst. Han gav ut tre salmesamlingar og preikesamlingar, og han stod bak Nynorsk salmebok (1928). Både i målsak og i teologiske spørsmål var han så markant at det stundom kom protestar når han søkte nye kall. Men når han først var tilsett, vart han ein overmåte avhalden prest, anten det var i Vanse på Lista, i Krødsherad, i Melhus, eller på Østre Toten. Hovden var heile livet sterkt engasjert i det frilyndte ungdomsarbeidet, skreiv talrike artiklar i blad og var ein populær talar i store og små forsamlingar.