Lærarforbundet

Lærarforbundet blei til i 1993, då Norsk Faglærarlag, Norges Handelslærarlag, Norsk Spesiallærarlag og NUFO gjekk saman. Med Lærarforbundet starta ei ny tid. Samtidig var denne organisasjonen produktet av ein prosess som tok til på slutten av 1800-talet, med forminga av ei lang rekkje ulike skoleslag av almenndannande og praktisk karakter. Nye lærargrupper kom til, knytte til handel, til yrkesfaga og til skolestellet for ulike typar spesialundervisning. Dei organiserte seg, forma kollektive interesser og utvikla læringstradisjonar som kom til å få stor tyding for skole og arbeidsliv. Forfattarane synleggjer dei lange linene i lærarorganisasjonane si historie under ulike samfunnsvilkår fram til dagens debatt om skole og arbeidsliv. Dei kastar nytt lys over samspelet mellom utviklinga i skolen og lærarorganisasjonane si rolle overfor staten i forming og iverksetjing av skolereformer. Knut Grove (f. 1964) er historikar og arbeider ved Rokkansenteret ved Universitetet i Bergen. Svein Michelsen (f. 1958) er dr.polit., førsteamanuensis ved Institutt for administrasjon og organisasjonsvitskap og forskar ved Rokkansenteret ved Universitetet i Bergen.